Արագ և համեղ սուրճ ԱերոՓրեսսով

Եթե սիրում եք սուրճ ու շատ ժամանակ չունեք, բայց ձեզ համար կարևոր է, որ սուրճը լինի թարմ և համեղ, Աերոփրեսսը լուծում է բոլոր այդ խնդիրները: Այս սարքով կարելի է ստանալ փափուկ և բալանսավորված համ, առանց կտրուկ թթվայնության կամ դառնության: Այն հեշտ է մաքրվում, առանձնահատուկ խնամք չի պահանջում, թեթև է, մատչելի ու հարմար ամեն միջավայրում օգտագործելու համար: Լինի առավոտյան խոհանոցում, աշխատավայրում, հյուր գնալիս թե ճամփորդելիս, մենք միշտ վերցնում ենք այն մեզ հետ:

Աերոփրեսսն աշխատում է ձեռքի ճնշման ազդեցությամբ ջուրը սուրճի աղացած հատիկների միջով անցկացնելու մեթոդով: Սուրճն անցնում է թղթե ֆիլտրի միջով, ինչը հնարավորություն է տալիս ստանալ ավելի պարզ ու մաքուր համ։ Այն նաեւ շատ ճկուն է, քանի որ բավականին լայն հնարավորություններ է ընձեռում ստանալու ամենատարբեր չափսի և թնդության սուրճ:

Մենք կիսվում ենք մեր ամենասիրելի մեթոդով, որի արդյունքում կստանաք մոտավորապես 200մլ միջին թնդության, ֆիլտրված սուրճ: Կօգտագործենք շրջված տարբերակը, ինչը մեզ թույլ կտա ստանալ ավելի հավասարաչափ թրմման ընթացք։

 

Բաղադրատոմս

18-20գր (մոտ 1.5 Աերոփրեսսի գդալ) սուրճ՝ աղացած Աերոփրեսսի համար (ծովի աղից քիչ մանր)

240մլ եռացրած ջուր

 

Պատրաստման եղանակ

Թղթե ֆիլտրը տեղադրեք ֆիլտրի գլխիկի մեջ ու եռացրած ջրով թրջեք այն: Այս քայլով, նախ եւ առաջ, կբացառենք թղթի համի փոխանցումը սուրճին, բացի այդ կտաքացնենք տարան, որի մեջ ֆիլտրելու ենք սուրճը։

         

Խցիկն ու մխոցը միացրեք իրար եւ սարքը շրջեք գլխիվայր, այնպես, որ խցիկը հայտնվի վերևում։

Սուրճը լցրեք խցիկի մեջ, հարթեցրեք և ավելացրեք սուրճի քանակից կրկնակի անգամ շատ ջուր՝ մոտ 40մլ։ Ջրի ջերմաստիճանը պետք է լինի մոտ 93°C:

      

Մի քանի անգամ խառնեք, համոզվեք, որ բոլոր հատիկները հավասարաչափ թրջվել են և թողեք այդպես մոտ 20 վայրկյան:

Այնուհ ետև, բ արակ շիթով եւ հավասարաչափ ավելացրեք մնացյալ ջուրը՝ մոտ 200մլ, որը կհասնի ընդհուպ մինչեւ խցիկի պռունկը: 

   Ամրացրեք ֆիլտրի գլխիկը, սպասեք 1 րոպե։  

      

Մեկ րոպե անց զգուշությամբ շրջեք սարքը գլխիվայր ու տեղադրեք նախապես տաքացրած տարայի կամ բաժակի վրա:

Սկսեք դանդաղ սեղմել մխոցին։

      

Երբ հասնեք վերջին ու լսեք հատկանշական ձայնը, դադարեք սեղմելը, քանի որ վերջին կաթիլները հավելյալ դառնություն կհաղորդեն Ձեր սուրճին։

Եթե մխոցն իջեցնելը Ձեզնից մեծ ջանք պահանջի, նշանակում է, որ սուրճի հատիկները չափից դուրս մանր են աղացած, իսկ եթե շատ հեշտությամբ ստացվի, ապա դրանք ավելի խոշոր են, քան անհրաժեշտ է:

Հանեք ֆիլտրի գլխիկը, հրեք մխոցը եւ թղթե ֆիլտրն ու սուրճի մնացորդներն ազատորեն դուրս կգան

Վայելեք :)

ՄԵՆՔ ԱՌԱՔՈՒՄ ԵՆՔ ԱՆՎՃԱՐ ԱՄԵՆ ՀԻՆԳՇԱԲԹԻ